સાબરકાંઠા: તલોદના આંબાવાડી ગામે દેશી દારૂની ભઠ્ઠી પર પોલીસનો દરોડો, રૂ. 6.38 લાખનો મુદ્દામાલ જપ્ત

ખારી નદીના કોતરમાં ચાલતી ગેરકાયદે ભઠ્ઠી ઝડપાઈ; 23 હજાર લીટર દારૂનો વોશ મળી આવ્યો, એક આરોપી ઝડપાયો અને ત્રણ આરોપીઓ વોન્ટેડ

તલોદ, તા. 10: સાબરકાંઠા જિલ્લામાં ગેરકાયદેસર દારૂની પ્રવૃત્તિઓ સામે કાર્યવાહી કરવા પોલીસ દ્વારા હાથ ધરવામાં આવી રહી છે. ત્યારે તલોદ તાલુકાના આંબાવાડી ગામની સીમમાં ખારી નદીના કાંઠે ગેરકાયદેસર રીતે દેશી દારૂ બનાવવાની ભઠ્ઠી પર તલોદ પોલીસે દરોડો પાડીને કુલ રૂ. 6,38,300ની કિંમતનો મુદ્દામાલ જપ્ત કર્યો છે. આ કાર્યવાહી દરમિયાન પોલીસે એક આરોપીને ઝડપી પાડ્યો હતો, જ્યારે અન્ય ત્રણ આરોપીઓને પકડવા માટે તપાસ હાથ ધરવામાં આવી છે.

પ્રાપ્ત વિગતો અનુસાર, સાબરકાંઠા જિલ્લા પોલીસ અધિક્ષક ડૉ. પાર્થરાજસિંહ ગોહિલ (IPS) તથા ગાંધીનગર રેન્જના નાયબ પોલીસ મહાનિરીક્ષક વીરેન્દ્રસિંહ યાદવની સૂચના મુજબ જિલ્લામાં ગેરકાયદેસર દારૂની પ્રવૃત્તિઓ સામે કાર્યવાહી કરવામાં આવી રહી છે. હિંમતનગર વિભાગના નાયબ પોલીસ અધિક્ષક એ.કે. પટેલના માર્ગદર્શન હેઠળ તલોદ પોલીસ સ્ટેશનના પોલીસ ઇન્સ્પેક્ટર સી.જી. રાઠોડ અને તેમની ટીમ પેટ્રોલિંગમાં હતી, તે દરમિયાન પોલીસને ખાનગી રાહે બાતમી મળી હતી.

તા. 9 ઓક્ટોબર, 2026ના રોજ મળેલી બાતમીના આધારે પોલીસ ટીમે તલોદ તાલુકાના આંબાવાડી ગામની સીમમાં ખારી નદીના કાંઠે આવેલી ખરાબાની જગ્યામાં દરોડો પાડ્યો હતો. સ્થળ પર દેશી દારૂ બનાવવાની ગેરકાયદેસર પ્રવૃત્તિ ચાલતી હોવાનું સામે આવ્યું હતું.

23 હજાર લીટર વોશ સહિત રૂ. 6.38 લાખનો મુદ્દામાલ જપ્ત

પોલીસની કાર્યવાહી દરમિયાન 500 લીટરની ક્ષમતાવાળા 46 પ્લાસ્ટિકના સિન્ટેક્સ ટાંકામાં ભરેલો અંદાજે 23,000 લીટર દેશી દારૂ બનાવવાનો વોશ મળી આવ્યો હતો, જેની કિંમત રૂ. 5,75,000 આંકવામાં આવી છે. આ ઉપરાંત બે પ્લાસ્ટિકના કેરબામાં ભરેલો અંદાજે 70 લીટર તૈયાર દેશી દારૂ, એલ્યુમિનિયમનાં ભઠ્ઠીનાં વાસણો, રબરની નળીઓ, આશરે 100 કિલો બળતણનાં લાકડાં, ગ્રે કલરનું હોન્ડા એક્ટિવા અને ઓપ્પો કંપનીનો મોબાઇલ ફોન સહિત કુલ રૂ. 6,38,300નો મુદ્દામાલ કબજે કરવામાં આવ્યો હતો.

એક આરોપી ઝડપાયો, ત્રણની શોધખોળ

આ મામલે પોલીસે દિવાનસિંહ દિપસિંહ ચૌહાણ (ઉંમર 24 વર્ષ, રહે. રામપુરા, તા. તલોદ, જિ. સાબરકાંઠા)ને ઝડપી પાડ્યો છે.

જ્યારે સતીષસિંહ ઉર્ફે છત્રસિંહ હઠીસિંહ રાઠોડ, વિરેન્દ્રસિંહ રંગુસિંહ રાઠોડ અને કનુસિંહ ઉર્ફે ધોની હાલુસિંહ રાઠોડ (તમામ રહે. આંબાવાડી, તા. તલોદ) આ કેસમાં વોન્ટેડ હોવાનું પોલીસની પ્રેસનોટમાં જણાવાયું છે. આ ત્રણેયને ઝડપી પાડવા માટે પોલીસે વધુ તપાસ હાથ ધરી છે.

તલોદ પોલીસની ટીમની કાર્યવાહી

આ સમગ્ર કાર્યવાહી તલોદ પોલીસ સ્ટેશનના પોલીસ ઇન્સ્પેક્ટર સી.જી. રાઠોડ, પોલીસ સબ-ઇન્સ્પેક્ટર બી.એલ. રાયજાદા તથા પોલીસ સ્ટાફની ટીમ દ્વારા કરવામાં આવી હતી. ગેરકાયદેસર દારૂની ભઠ્ઠી ઝડપાતાં વિસ્તારમાં ચકચાર મચી હતી.

નોંધ: આ અહેવાલ પોલીસ દ્વારા આપવામાં આવેલી પ્રેસનોટમાં દર્શાવેલી વિગતોના આધારે તૈયાર કરવામાં આવ્યો છે. આરોપીઓ સામેના આક્ષેપો અંગેનો અંતિમ નિર્ણય ન્યાયિક પ્રક્રિયાને આધીન રહેશે.